भन्सार

                     -लालगोपाल सुवेदी

भन्सारको त्यो खरदार कस्तो

छ शक्तिशाली तरबारजस्तो

कोही कसैको हतियारजस्तो

धर्ती भुलेको मतियारजस्तो ।

        (१)

हरेक मैना बढिया कमाइ

मानौँ छ चारैतिर हाई-हाई

पाई बडाहाकिमबाट दृष्टि

गर्दै छ नौलो घरबार सृष्टि ।

        (२)

छ सान नौलो परिधान नौलो

ठाँटै छ नौलो अभिमान नौलो

भन्दै छ- पारूँ अब यो भविष्य

भावी पिँढीको पनि झन् सुनौलो ।

        (३)

आफ्नै छ प्राडो महँगो पजेरो

ऊ भन्छ व्यापार अपार मेरो

छ थप्नु मैले सुनको धुरी नै

यहीँ म सिर्जूँ अलकापुरी नै ।

       (४)

लरक्ककी होटलकी परीको

छ म्वाइँ मीठो नवसुन्दरीको

पैसा भए जे पनि गर्न सक्छु

सम्पूर्ण न्यायालय किन्न सक्छु ।

       (५)

झुल्दा उता होटलभित्र राती

मन्त्री स्वयम् नै पनि बन्छ साथी

छ है अनौठो अनमोल झोल

गर्ने त्यही टेन्डरको कबोल ।

         (६)           - स्याङ्जा